Kom for å spele på Norway Cup – vart invitert på konsert av Karpe

Denne veka deltok 25 ungdommar frå Palestina og Libanon på Norway Cup.

På t-bana heim frå Ekebergsletta i Oslo dansa ungdommane til Karpe si låt PAF.no og la ut video på Instagram.

Det fekk rap-duoen med seg, og inviterte ungdommane til å kome på den første av dei ti konsertane Karpe skal spele i Oslo Spektrum.

Den første starta i kveld.

– Det er veldig gøy at dei vart merksame på oss, seier Altayeb Albuhaisi (14).

Han er ein av ungdommane, og skal i dag på sin første konsert.

– Eg gler meg veldig.

Skal gi fotballpokalen til Karpe

Dei stilte med to fotballag på Norway Cup, eit jentelag og eit gutelag.

Gutelaget vann bronse i cupen, og som takk for at dei får kome på konsert seier Albuhaisi at dei skal gi pokalen til Karpe.

Det fekk fotballgjengen høve til. Dei møtte nemleg Chirag Rashmikant Patel og Magdi Omar Ytreeide Abdelmaguid før konserten starta.

Fotballaga frå Palestina står utanfor Oslo Spektrum og ventar i spenning før dei skal på konsert til Karpe.

Foto: André Børke / NRK

Foto: André Børke / NRK

Det er mykje dans og moro før ungdommane skal inn på konserten.

Foto: André Børke / NRK

Ungdommane er i Noreg i ei tid der heimstaden deira er under angrep.

Fredag sa Palestinske styresmakter at minst ti menneske er drepne og 79 skadde etter israelske angrep mot Gazastripa. Israel har varsla at angrepa vil halde fram ei veke til.

Over 100.000 billettar er selt

Over 100.000 konsertbillettar til Karpe-konsertane er selt, og ingen andre har gjort dette før.

Då NRK møtte duoen tidlegare i veka innrømma Chirag og Magdi at dei er stressa.

– Vi tenker på alle detaljane som skal på plass før showet – så ja, svarte Magdi.

Konsertane skulle eigentleg gå av stabelen i august 2021, men vart flytta til 2022 grunna korona.