Hundrevis omkomne i Søraust-Asia etter flaum og skred

Laurdag går det føre seg eit stort redningsarbeid i Indonesia og på Sri Lanka.

Landa er råka av flaum og skred som følge av jordskjelv og kraftig nedbør etter ein tropisk syklon.

Hundrevis av menneske har omkomme og fleire er framleis sakna.

No jobbar redningsmannskapar med å nå fram til offer.

Fryktar fleire omkomne

I Indonesia har dødstalet stige til 248, opplyser lokale myndigheiter melder NTB.

Myndigheitene fryktar at talet vil stige ytterlegare.

I tillegg er 90 personar sakna og over 500 skadd, melder nyheitsbyrået AFP.

Redningsarbeidet er krevjande på grunn av øydelagt infrastruktur og brotne kommunikasjonslinjer.

Totalt er over 12.000 personar evakuert i landet, opplyser Reuters.

Også på Sri Lanka går det føre seg eit utfordrande redningsarbeid.

Laurdag opplyser myndigheitene om 123 omkomne.

Uvêret byrja i førre veke. Kraftig styrtregn har ført til jordskred og flaum.

Til no er over 40.000 personar evakuert til skular og offentlege opphaldsrom, melder Al Jazeera.

Thailand sin statsminister beklagar

Uvêret har også råka Thailand. Fleire område har hatt vasstandar på tre meter.

Til no har minst 145 personar omkomme.

– Eg må be om unnskylding for at dette skjedde medan eg sit i regjering. Neste steg er å hindre at situasjonen blir verre, sa Thailand sin statsminister Anutin Charnvirakul fredag.

Thailandske myndigheiter har innført hjelpetiltak til dei som er råka av flaumen.

Interessert i utanriksstoff? Høyr Urix sin podkast: