Benjamin Ingrosso om kjærleikslivet: – Eg er singel og veldig dårleg på å date

– Eg er veldig, veldig dårleg på å date, fortel artist Benjamin Ingrosso om kjærleikslivet.

Akkurat dét kan vere vanskeleg å tru på. Den 28 år gamle superstjerna har dei siste åra blitt eit av dei mest kjente namna i nordisk pop.

Han kjem frå ein av Sveriges mest kjente familiar: Han er son av artisten Pernilla Wahlgren, fetter til Sebastian Ingrosso frå Swedish House Mafia – og ikkje minst er han broren til Bianca Ingrosso, influensar og suksessrik gründer bak Caia Cosmetics.

Men sjølv om han sjeldan datar, fekk han ei morosam og lærerik oppleving under innspelinga av «Dama til».

Ei annleis datingoppleving

– Eg har aldri opplevd noko slikt før, der ein skal date ei jente på den måten, i så mange dagar. Det kjendest så ekte, sjølv om det ikkje var det.

Han fekk veldig sansen for programleiar Annika Momrak.

– Ho er ti poeng. Ho er så morosam og søt, og enkel å jobbe med.

Sidan han ikkje går så ofte på date var erfaringa nyttig, fortel han:

– Eg syntest berre det var jævlig morosamt. Det var lærerikt for meg å vite korleis eg skal gjere det når eg datar på ordentleg.

Avslører kjærleiken i nytt album

– For korleis går det med kjærleikslivet?

– Akkurat nå fokuserer eg på andre ting, og på å vere så mykje som mogleg i studio. Då endar ein jo opp med å skrive om det ein går gjennom. Så eg tenker at ein får høyre på musikken min når den kjem, og lage sin eigen tolking av korleis kjærleikslivet går.

– Kryptisk, men er du singel?

– Ja, eg er singel.

Ingrosso fortel vidare at når han fyrst vel å date, er det ofte i utlandet:

– Så eg datar jo sjeldan jenter som er frå Sverige. Når eg er mykje utanlands og jobbar, da har eg lettare for å date. Det kjennest enklare på eit vis, eg veit ikkje kvifor. Eg kan jo ikkje sitte på kva for ein helst restaurant, for eksempel.

Synest norske jenter er meir avslappa

Når han blir spurt om han kunne date ei norsk jente, svarer han raskt:

– Ja, absolutt. Det har eg gjort.

– Korleis skil norsk og svensk dating seg?

– Språket er vel det første eg tenkjer på. Eg synest norske jenter er meir avslappa og seg sjølv, medan svenskar av og til speler litt «hard to get» og kan vere meir usikre. Norsk dating kjennest generelt friare og enklare, svarer han.

Forventingar og press som kjend

Som kjend person merkar han at dating kan vere krevjande.

– Her heime held det at ein går på ein date, og så står det plutseleg at ein er saman. Da har ein kanskje gitt nokon falske forhåpningar.

Han har også følt på eit press om å ha eit visst image å leve opp til.

– Ja, eg har hatt det, men eg har begynt å sleppe litt på det no. Målet mitt er berre å vere meg sjølv i alle rom eg kjem inn i. Har eg ein dårleg dag, så gir eg meg sjølv tillating til å ta det litt roleg, og ikkje vere så utåtvend.

– Om ikkje nokon likar det, så er det deira problem. Eg veit kven eg er innvendig, og det held.

Dedikert

Programleiar Annika Momrak kan skrive under på at Ingrosso er ein varm og jordnær person.

– Han er veldig flink til å vere til stades i augeblikket, trass i at det alltid er mykje action og mange folk rundt han.

Det som likevel overraska ho mest var kor dedikert han er når det kjem til handverket bak musikken.

– Han har hjartet sitt i kvar einaste detalj, og er med i heile prosessen frå idé til ferdig låt. Han er ikkje berre kjekk, han er rett og slett ein hartarbeidande musikar som går og tenker på nye songar heile tida.

Draumedaten er i Oslo

Sjølv om Ingrosso er veldig fokusert på musikken, er han ikkje i tvil om korleis ein perfekt date hadde sett ut.

– Min draumedate er å henge ein dag i Oslo, ete på ein god restaurant som Little Wolf eller Pao, dra på W.B. Samson og kjøpe ein kanelbolle, kanskje gå på kino eller på ein musikal.

Under innspelinga var Ingrosso veldig fornøgd når Momrak kom med ein av hans favorittar.

– Ho gav meg ein agurk- og osteskive, og ein kanelbolle. Eg fekk verkeleg alt eg ønskja meg, seier han og ler.

Drøymer om familielivet

Når han ser framover, har han klare planar:

– Min draum er vel at eg skal få vere pappa, ha barn og ha ein familie og leve i ein villa, samtidig som eg jobbar med det eg gjer. Eg ønsker å ha eit liv som også inkluderer familieliv.

Til slutt reflekterer han over den uventa vendinga i serien.

– Eg syntest det var morosamt. At det var ein morosam twist på sjølve programmet, å bli dumpa, seier han og ler.